Euskorriak eta postontzi bidezko banaketa

Eskuorriak tamaina eta gramaje txikiko paper-orriak dira, eta, mezu labur eta zehatz baten bidez, enpresa edo erakunde baten produktu eta zerbitzuei buruzko publizitate-informazioa emateko erabiltzen dira.

Eskuorriak publizitate-baliabide bat dira, enpresa edo erakunde baten irudia indartzeko edo, besterik gabe, ekitaldi baten berri emateko edo zerbitzu bat sustatzeko.

Postontzi bidezko banaketa zuzeneko marketin-ekintza bat da. Hartan, publizitate-inprimakiak sartzen dira produktu edo zerbitzu jakin batzuen kontsumitzaile potentzialen postontzietan, haien berri emateko.

Eskuarki, eskuorriak bezeroei helarazteko, postontzietan sartu, eskura eman, ibilgailuaren haizetakoan utzi edo atearen eskutokian jartzen dira.

Formatua

Oro har, eskuorriak txiki samarrak izaten dira. Gehienetan, orri-laurden baten tamainakoak (A5 baten antzekoa) dira, eta orri bat soilik dute.

Horrelako dokumentuetarako ohiko beste tamaina batzuk A4 eta A5 formatuak dira, baita A6 ere.

Orobat, bezeroaren beharren arabera, neurri berezietako eskuorriak ere egin daitezke.

Inprimaketa

Eskuorriak alde batetik edo bi aldeetatik inprima daitezke, beharraren arabera. Normalean, modu hauetako batean inprimatzen dira:

  • koloretan (kuatrikomia)
  • beltzez
  • bi koloretan
  • aurreko guztiak konbinatuta

Zenbaitetan, Pantone koloreak edo tinta bereziak erabiltzen dira, kolore-sorta zabaltzeko eta eskuorriari kolore-xehetasun erakargarriak emateko edo, besterik gabe, enpresa edo erakundearen kolore korporatiboak izateko.

Euskarria

Eskuorriak inprimatzeko, askotariko euskarriak erabiltzen dira, baina, oro har, paper iztukatuak, offset papera eta paper birziklatuak erabiltzen dira. Ez da ohikoa eskuorriak paper berezietan inprimatzea, gutxi irauten duen produktua baita.

Eskuorrietan erabiltzen diren gramajeak txikiak izaten dira, 80 eta 150 gramo bitartekoak. Hala ere, ez dago benetako mugarik alde horretatik, eta edozein gramaje aukera daiteke eskuorriak inprimatzeko. Dena den, kontuan hartu behar da gramaje handiak erabiliz gero produktua asko garestitzen dela.

Aholkuak

Eskuorrien formatua aukeratzeko, beharrezkoa da zabaldu nahi ditugun edukien eta mezuaren kopurua eta tamaina kontuan hartzea, eta horretan oinarrituta formatu egokia aukeratzea.

Formatu handiegia erabiltzen badugu, produktuaren kostua handitu egingo da (batez ere kopuru handietan).
Formatu txikiegia erabiliz gero, ordea, gure mezua ez da irakurterraza izango, eta, beraz, indarra galduko du.

Bezeroei eskuorriak posta arruntez (mailing) helarazi nahi bazaizkie, bereziki garrantzitsua da gramaje egokia erabiltzea; izan ere, gehiegizkoa aukeratzen badugu, eskuorriek pisu handiegia izango dute, eta postako bidalketa askoz garestiagoa izango da, tarifikazio handiagoko pisu-tarte batean egongo baita. Horrelako kanpaina bat egin aurretik, behar bezala aztertu behar da postaz bidaltzen diren elementu guztien pisua, inolako beharrik gabe gehiegizko pisua izan ez dezaten.